Район мәҙәниәт йортонда Ейәнсура районы башҡорттары Ҡоролтайының сираттағы отчёт-һайлау конференцияһы үтте.

Район мәҙәниәт йортонда Ейәнсура районы башҡорттары Ҡоролтайының сираттағы отчёт-һайлау конференцияһы үтте.
*Фойела ҡул эштәре күргәҙмәһе ойошторолдо. Милли биҙәүестәр, милли кейемдәр, балаҫ һуғыу оҫталары үҙ эштәре менән уртаҡлашты. Халҡыбыҙҙың милли ризығы - талҡанда булды. Милли асылыбыҙҙы күрһәтеүсе был күргәҙмә бай һәм йөкмәткеле булыуы менән барыһын да әсир итте.
**Сараға ике йөҙгә яҡын делегат йыйылды. Улар араһында - йәмәғәт ойошмалары вәкилдәре, мәғариф, мәҙәниәт һәм башҡа тармаҡ хеҙмәткәрҙәре булды.
***Ултырышта район Хакимиәте башлығы Дамин Марат улы Юланов, Башҡортостан Республикаһының Матбуғат һәм киң мәғлүмәт саралары агентлығы етәксеһе урынбаҫары Ғәзизов Марат Әсхәт улы,
Башҡортостан Республикаһы Дәүләт Йыйылышы-Ҡоролтай депутаты, республикабыҙҙың Дәүләт Йыйылышы-Ҡоролтай рәйесенең аграр мәсьәләләр, экология һәм тәбиғәттән файҙаланыу буйынса беренсе урынбаҫары, депутат Рәил Рамаҙан улы Әбдрәхимов, Бөтә донъя башҡорттары ҡоролтайы башҡарма комитеты ағзаһы, Урал-аръяғы райондары кураторы Рәхмәтуллин Хәлил Юлай улы ҡатнашты.
****Ултырышты район Ҡоролтай башҡарма комитеты рәйесе Байрас Канчурин алып барҙы. Ул һуңғы биш йылда район ҡоролтайы тарафынан эшләнгән эштәргә, үткәрелгән сараларға һәм әлеге көндә хәл ителәһе мәсьәләләргә туҡталды.
*****Ултырыштың мөһим мәсьәләләре: башҡарма комитетҡа яңы ағзалар һәм Өфө ҡалаһында үтәсәк VI Бөтә донъя башҡорттары ҡоролтайы съезына делегаттар һайланды.